Har kuni 10:00 - 21:00

Restavratsiya chog‘idagi topilma: tarixiy rangtasvir pannolar

Kutubxonani qayta qurishdagi yoqimli tuhfa va kutilmagan topilma XX asrning 60-yillariga taalluqli manzarali rangtasvir devoriy pannolar bo‘ldi.

Ammo bu bilan hikoya yakunlanib qolmaydi! Pannolarni ehtiyotkorlik bilan tiklash va ularni kelgusi bus-butligini ta’minlash maqsadida Turkiyaning “Mesa” kompaniyasidan sulolaviy restavratorlar taklif qilindi. Professor Munevver Ucher, dotsent Kaya Ucher va restavrator Elif Naz Ucherdan iborat uchlik manzarali pannolarimizni restavratsiya qilish ishlariga qo‘shildilar. Ilgari ushbu restavratorlar jamoasi Topkapi saroyi, Istanbuldagi Aya Sofiya va Sulaymoniya masjidlari va boshqa madaniy meros inshootlarida shiftdagi rasmlarni restavratsiya qilish ustida ishlagan.

Kaya Ucher biz bilan topilma tafsilotlari bilan o‘rtoqlashdi:

“Restavratsiya ishlari mobaynida olingan maʼlumotlarga koʻra, devoriy suratlar oʻtgan asrning 60-yillari boshlarida yaratilgan deb taxmin qilamiz. Kuzatishlarimiz shunday xulosaga kelishga imkon beradiki, suratlar devor sirtida moy-bo‘yoq bilan, oftobda toblangan somon va loy qorishmasidan tayyorlangan. Bu ashyo Turkiyada “kerpiç” yoki O‘zbekistonda “somon” nomlari bilan mashhur bo‘lib, mintaqaga xos qurilish materialidir. Somonning moy-bo‘yoqlar bilan uyg‘unlashuvi ta’sirli devoriy suratlarni yaratishga imkon berib, o‘z tarkibi sharofati bilan bugungi kungacha saqlanib qolgan. Qayta tiklash ishlari yakunlangach, bo‘yoq qatlamlarining parchalarini Turkiyadagi restavratsiya laboratoriyasida tahlil qilishni rejalashtiryapmiz. Bu bizga topilgan pannolar tavsifi haqida aniqroq xulosalar chiqarishga imkon beradi”.

Shuningdek o'qing

Munnever Ucher esa nega pannolar shu yilning yoziga qadar bo‘yalgan va nazardan panada qolgan bo‘lishi mumkinligi haqidagi farazlari bilan baham ko‘rishdi:

“Ehtimol, rangtasvir pannolar bo‘yoqlarning eskirishi va xiralashishi yoki ko‘zga tashlanuvchi tashqi shikastlanish tufayli bo‘yalgan. Yoki boshqa taxminga ko‘ra, inshootning ichki qismi o‘zgarganligi sabab bo‘lgan bo‘lishi mumkin. Nima bo‘lganda ham suratni bo‘yash qarori alaloqibat tasvirlarni saqlab qolgan. Pannolarni qayta tiklash jarayonida biz asl suratni ko‘rish mumkin bo‘lgan tarzda devoriy suratni tozalashga harakat qilamiz. Biz asarning dastlabki tarovatini saqlab qolish maqsadida shu asarning betakror ranglari va bo‘yash texnikasiga moslashtirgan holda an’anaviy usullarni qo‘llashni rejalashtirganmiz. Maqsadimiz shikastlarni bartaraf etib, bezavol qolgan asarlarni munosib himoya bilan ta’minlashdir”.

Qayta tiklangan manzarali pannolarni sentabr oyining boshidayoq Respublika bolalar kutubxonasi tashrif buyuruvchilar uchun o‘z eshiklarini ochgan chog‘da tomosha qilish mumkin bo‘ladi.

Murojaatlar uchun

+99871 231 17 91
info@acdflibrary.uz

Ish vaqti

Har kuni 10:00 - 21:00
Kitob berish kutubxona yopilishidan
30 daqiqa oldin yakunlanadi

Manzil

Toshkent, Yahyo G‘ulomov ko‘chasi, 47-uy


Kutubxonaga oid soʻnggi yangiliklar bevosita pochta qutingizda